![](uploads/news/66d83009380339.20792039.jpg)
გამარჯობა,
მე ვარ მარიამ ჭარხალაშვილი, რაჭიდან, კერძოდ სოფელ ნიკორწმინდიდან, პროფესიით ვარ თარგმანების და კულტურათაშორისი ურთიერთობების სპეციალისტი და ასევე მაქვს საოჯახო სასტუმრო „არტ რაჭა“, რომელსაც დედასთან ერთად ვმართავ. დეტალურად მინდა გაგაცნოთ ჩვენი წამოწყება და გეტყვით რომ ეს მხოლოდ სასტუმრო არაა, აქ ასევე გვაქვს გალერეა მოწყობილი მესამე სართულზე, უფრო დეტალურად კი ეს არის გამოფენა, რომელიც მუდმივმოქმედია, რომელშიც ხშირად თანამედროვე ქართველი მხატვრების ნამუშევრები გვაქვს გამოფენილი, როგორც ფერწერული ტილოები, ასევე ხელნაკეთი ნივთები და სუვენირები. ამ ინოვაციური იდეის განხორციელებაში ფასდაუდებელი წვლილი მიუძღვის ევროკავშირის, შვედეთის და ავსტრიის ერთობლივი მხარდაჭერით განხორციელებულ პროექტ GRETA-ს, რომლის ფარგლებშიც თანადაფინანსების საფუძველზე მოვახერხე ჩემი ოცნების განხორციელება.
აქვე გეტყვით თუ როგორ შევიტყვე პროექტის შესახებ, მე 16 წლიდან სხვადასხვა სტარტაპებით ვიყავი დაინტერესებული და რამდენიმე მათგანში მონაწილეობის მიღების გამოცდილებაც მქონდა, რაც პოზიტიური გამოცდილება იყო ჩემთვის. აქედან გამომდინარე მუდმივად თვალს ვადევნებდი განახლებულ ინფორმაციებს საგრანტო პროგრამების შესახებ და სწორედ ძიების ამ პროცესში ვნახე სატელევიზიო სიუჟეტი, რომელმაც დიდი დაინტერესება გამოიწვია. მთავარი მიზეზი ის იყო რომ ევროკავშირის, შვედეთის და ავსტრიის დაფინანსებით ხორციელდებოდა და ეს მეტ სანდოობას იწვევდა, ასევე ჩემთვის მისაღები იყო რომ ეს ფაქტორი საერთაშორისო სტუმრების მოზიდვაშიც დამეხმარებოდა ჩემი საოჯახო სასტუმროსთვის.
რამდენიმე ეტაპის წარმატებით გავლის მერე გამიმართლა და მოვიპოვე დაფინანსება, რომლითაც შევიძინე სასტუმროსთვის საჭირო ტექნიკა და ავეჯი, რომელმაც მისი გამართულად ფუნქციონირების საშუალება მომცა. ფაქტობრივად ამან განაპირობა სასტუმროს გახსნაც. წელს პირველი წელია და ძირითადი აქცენტი ცნობადობის გაზრდაზე გავაკეთეთ, თუმცა ამ მცირე მონაკვეთშიც შეიძლება ითქვას რომ ჩვენმა იდეამ საკმაო მოწონება დაიმსახურა. ჩვენ უნიკალური სერვისი შევთავაზეთ სტუმართა ჯგუფებს შემოქმედებითი საღამოების, ხატვის მასტერ კლასების და ცოცხალი მუსიკის სახით. ვფიქრობ ამ კუთხით გამორჩეულები ვართ ბაზარზე და ჩვენს ნიშას მალე დავიკავებთ.
დონორების დახმარებით განხორციელებულმა ამ ერთი შეხედვით მცირე დახმარებამ გააჩინა სტიმული ადგილობრივი სოფლის მოსახლეობისთვის, ვისგანაც სტუმრები ნატურალურ პროდუქტებს და ღვინოს იძენენ, ასევ ჩვენც გაგვიჩნდა გაფართოების სურვილი და ვგეგმავთ კოტეჯის დამატებას ჩვენსავე ეზოში, რაც წლევანდელი მოთხოვნიდან გამომდინარეობს.
ვფიქრობ, ჩემი ისტორია შეიძლება სამოტივაციოდ გამოდგეს სხვა მეწარმეებისთვის, რადგან ჩემი სურვილი, გამეკეთებინა ერთგვარი კულტურული ცენტრი და დამსვენებლები წასულიყვნენ არა მხოლოდ რაჭის ბუნების შთაბეჭდილებებით არამედ იმ ხელობითაც, რომელსაც მათ აქ გავაცნობდი, წარმატებით მივიტანე ჩემს სტუმრებამდე. ამას ვერ მივაღწევდი, რომ არა გრეტა პროექტი და რომ არა საკუთარი იდეის რწმენა, ამიტომ თამამად ვიტყოდი რომ ჩემი წარმატების ფორმულა არის საკუთარი იდეის ბოლომდე დაჯერებაში და წინააღმდეგობის მიუხედავად არასდროს არ უნდა დანებდეს ადამიანი!
დასასრულს მინდა აბსოლუტური მზაობა და სურვილი გამოვხატო სხვა მსგავს პროექტებთან თანამშრომლობისთვის, ეს ცალსახად პოზიტიური მოვლენაა დამწყები მეწარმეებისთვის და დაინტერესების შემთხვევაში ჩემთან კომუნიკაცია შესაძლებელია ელ-ფოსტის: charkhalashvilimari@gmail.com, ინსტაგრამის და ფეისბუქ გვერდის საშუალებით „არტ რაჭა“.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის